छत्रपती संभाजीनगर : एमआयएमचे प्रदेशाध्यक्ष आणि माजी खासदार इम्तियाज जलील यांच्या पदयात्रेदरम्यान बायजापूरमध्ये आज प्रचंड गोंधळ आणि राडा झाला. पक्षांतर्गत असलेल्या नाराजीचा फटका या पदयात्रेला बसला असून, कार्यकर्त्यांमध्ये झालेल्या फ्री-स्टाईल हाणामारीमुळे परिसरात तणावाचे वातावरण निर्माण झाले. परिस्थिती नियंत्रणात आणण्यासाठी अखेर पोलिसांना सौम्य लाठीमार करावा लागला.

इम्तियाज जलील हे पक्षाच्या प्रचारासाठी आणि जनसंपर्कासाठी बायजापूर दौऱ्यावर होते. पदयात्रेला सुरुवात होत असतानाच, एमआयएममधील एका गटाने जलील यांच्या विरोधात घोषणाबाजी करत काळे झेंडे दाखवले. ही नाराजी काही स्थानिक पदाधिकाऱ्यांच्या निवडीवरून किंवा उमेदवारीवरून असल्याचे बोलले जात आहे. काळे झेंडे दाखवल्यानंतर पदयात्रेतील समर्थक आणि नाराज कार्यकर्ते यांच्यात बाचाबाची सुरू झाली. पाहता पाहता या वादाचे रूपांतर हाणामारीत झाले. इम्तियाज जलील यांच्या डोळ्यादेखतच कार्यकर्ते एकमेकांवर धावून गेले आणि लाथाबुक्क्यांनी हाणामारी सुरू झाली. यामुळे पदयात्रेत मोठी धावपळ उडाली.

पोलिसांचा सौम्य लाठीचार्ज

घटनेचे गांभीर्य ओळखून बंदोबस्तावर असलेल्या पोलिसांनी तात्काळ हस्तक्षेप केला. मात्र, गर्दी आणि गोंधळ वाढतच गेल्याने जमावाला पांगवण्यासाठी पोलिसांनी सौम्य लाठीचार्ज केला. पोलिसांच्या हस्तक्षेपानंतर कार्यकर्त्यांना पांगवण्यात आले आणि परिस्थिती नियंत्रणात आणण्यात आली.

पक्षांतर्गत वाद चव्हाट्यावर

या घटनेमुळे एमआयएममधील अंतर्गत गटबाजी उघड झाली आहे. प्रदेशाध्यक्षांच्या उपस्थितीतच अशा प्रकारे राडा झाल्याने राजकीय वर्तुळात उलटसुलट चर्चांना उधाण आले आहे. या गोंधळानंतर पदयात्रेच्या सुरक्षेमध्ये वाढ करण्यात आली आहे.